राष्ट्रीय स्वयंसेवक संघाचे सरसंघचालक प. पू. डॉ. मोहन भागवत जी यांनी २३ सप्टेंबर २०२६ रोजी ओरिक्कई येथे पूज्य कांची आचार्य यांची भेट घेतली. यावेळी त्यांचा पारंपरिक शिरोभूषणे देऊन सत्कार करण्यात आला. तसेच श्री कामाक्षी अंबाल देवस्थान यांच्याकडून त्यांना प्रसाद देण्यात आला आणि वरिष्ठ वेद पंडितांच्या मार्गदर्शनाखाली वैदिक मंत्रोच्चारही करण्यात आले.
सरसंघचालक डॉ. मोहन भागवत यांनी श्री कांची कामकोटी पीठाचे जगद्गुरु श्री शंकर विजयेंद्र सरस्वती शंकराचार्य स्वामीजी यांनी श्री चंद्रमौळीश्वर स्वामींचा केलेला अभिषेक ही पाहिला. त्यानंतर समाज, राष्ट्र आणि संपूर्ण विश्वाच्या कल्याणासाठी वेदपंडितांनी आयोजित केलेल्या वैदिक मंत्रपठण, जप आणि विशेष प्रार्थनांमध्ये त्यांनी सहभाग घेतला .
यावेळी जगद्गुरु आदि शंकराचार्यांच्या पवित्र पादुकांचे विशेष पूजन करण्यात आले आणि ‘तोटकाष्टकम्’चे पठण करण्यात आले.
कुटुंबव्यवस्था आणि धर्माधिष्ठित मूल्यांचे महत्त्व अधोरेखित करणा-या पारंपरिक दांपत्य पूजेचे आयोजन करण्यात आले. तब्बल ६० वर्षांचा वैवाहिक सहजीवनाचा टप्पा पूर्ण केलेल्या एका ज्येष्ठ दांपत्याच्या हस्ते ६० ज्येष्ठ दांपत्यांचा सन्मान करण्यात आला.
डॉ. मोहन भागवत यांनी ‘संग्रहणीये-इष्टि’ या श्रौत विधीच्या पूर्णाहुतीचेही दर्शन घेतले. जगभरातील जनतेच्या शांती, समृद्धी आणि सुख-समाधानासाठी प्रार्थना करत हा विधी पार पडला.
सरसंघचालकांनी कांची मठाच्या ‘विद्या, वेद आणि वैद्य’ या क्षेत्रातील विविध उपक्रमांची माहिती घेतली. यामध्ये शाळा, वेदपाठशाळा, पारंपरिक हस्तकला व शिल्पकला प्रशिक्षण केंद्रे तसेच मुलींसाठी सांस्कृतिक शिक्षण देणाऱ्या संस्थांचा समावेश आहे. त्यानंतर पूज्य शंकराचार्य स्वामीजींच्या आशीर्वादाने आयोजित करण्यात आलेल्या ‘चॅरिटी मॅनेजमेंट’ अभ्यासक्रमाची पहिली तुकडी पूर्ण केलेल्या विद्यार्थ्यांच्या प्रमाणपत्र वितरण समारंभालाही ते उपस्थित राहिले.
डॉ. मोहन भागवत यांनी यावेळी ओरिक्कई येथील शंभर वर्षे जुन्या घराला भेट दिली. याच घरात १९५५ मध्ये राष्ट्रीय स्वयंसेवक संघाचे द्वितीय सरसंघचालक पूजनीय गुरुजी श्री. माधव सदाशिव गोळवलकर यांनी पूज्य कांची महास्वामींचे दर्शन घेतले होते. या ऐतिहासिक भेटीच्या स्मरणार्थ संबंधित कुटुंबीयांनी डॉ. मोहन भागवत यांना स्मृतिचिन्ह भेट दिले. १९८८ मध्ये कांची आचार्य त्रिवेणी यांनी याच घरात चातुर्मासाचे अनुष्ठानही केले होते.